Praha woła!

Lubi studenća!

Lětny semester 2013 chila so ke kóncej a lědma štó ze studentow nětko hižo na Schadźowanku mysli. Zo pak njebychu so přihoty w nowembru w stressu přewróćeli, je ZSS z.t. kubłansku jězbu do Prahi přihotował. Tuta ma słužić k mjezsobnemu zeznaću, tež nowačkow-studentow, k zabawje, ale tež jako přihot na Schadźowanku.
Jězba ma so wot 28.09. do 29.09.2013 přewjesć. Was studentow wočakuje pisany program, dźěłarnički, zhromadny wječork a wězo wólny čas, kotryž móžeće w krasnej Praze přežiwić.
Dokładniše informacije namakaće pod https://www.dropbox.com/sh/u0bq0249yv30qyl/QFUhIlJMJy w dokumenće "Studentski wulět a serbski wječor w Praze".
Wjeselimy so přez kóždeho zajimca. Přizjewić móžeće so pod student.witaj.zss@live.de abo na štwórtkach a pjatkach wot 7.00 do 16.00 hodź. pod 035796/850018. Swójski podźěl wučinja 20€.

K dalšim prašenjam steji wam Franciska Wróblowa (student.witaj.zss@live.de) k dispoziciji.

Štó smy....?!

Lubi studenća!

Zwjazk serbskich studowacych chce so zaso aktiwnišo za serbskich studentow zasadźować a angažować. W lětušich wólbach do Zwjazkoweho předsydstwa je so Tomaš Jurk k zastupjerjej ZSS w Zwjazkowym předsydstwje Domowiny wolił a wěnuje so nětko na tutej runinje studentskim naležnosćam. Tomaš Jurk, pochadźacy z Wotrowa, je w Iserlohn Informatiku studował a znaje serbske studentstwo derje. Nimo toho běše wón jedyn z tych aktiwnych při załoženju domowinskeje skupiny Wotrowska młodźina O2
w lěće 2003. Wulke zasłužby měješe Tomaš Jurk jako załožer serbskeje internetoweje platformy
www.interserb.de, kotraž słužeše wjele lět, wosebje młodźinje jako wirtuelne serbske zetkawanišćo.

W ramiku wožiwjenja ZSS je so tež tak mjenowany mini-job studentskeho koordinatora wutworił, kotryž je so z Francisku Wróblowej wobsadźił. Mnohim skerje jako Franciska Kralec znata, studowaše wona w Lipsku a w Halle stawizny a etnologiju a je so w tutym času aktiwnje na studentskim žiwjenju we woběmaj městomaj wobdźěliła. Wona je sobustaw Sorabije Lipsk, běše něšto lět w redakciji studentskeho satiriskeho časopisa Šeršeń a je w studentskim chórje sobuspěwała.

Tomaš Jurk a Franciska Wróblowa podpěrataj so aktiwnje wot Dowominy a Witaj - Rěčneho centruma. Iniciator wožiwjenja ZSS je Clemens Škoda, referent za kulturne naležnosće a wukraj. Wón je městno studentskeho koordinatora do žiwjenja wołał a koordinatorku při wšěm podpěruje.

Hromadźe spytamy wam studentam ze stajnym partnerom być a wam při wšěm pomhać, podpěrować a was wo wšěch wažnych projektach a terminach informować.
Nimo tuteho bloga eksistuje w socialnej syći facebook tež skupina Zwjazka serbskich studowacych z.t., kotraž serbskich studentow po cyłej Němskej zwjazuje a stajnje wo relewantnych nowosćach a pokiwach informuje (https://www.facebook.com/studentstwo).

Naprašnik

Zwjazk serbskich studowacych z.t. (ZSS) chce so za serbskich studentow aktiwnje angažować. Waše studijne města su hłownje zwonka Łužicy a z tym wam pomoc a podpěra na městnje hustohdy pobrachuja. Z nachwilnym wobsadźenjom městna koordinatorki za studentske naležnosće prócuje so ZSS z.t. w tutym času styki k serbskim studentam a studentskim towarstwam – wam – nawjazać. Zo pak by wam pomoc a podpěra po zakónčenju tuteho projekta dale zaručena była, su kontaktowe daty trěbne. Z tym móža so nawjazane styki bjezporočnje dale wjesć. Nimo toho nastanje wulka syć, kotraž je tež wam studentam mjezsobu wobohaćenje. Móža so styki mjez studentskimi městami natwarić, studenća móža zwěsćić štó hišće w samsnym abo susodnym měsće studuje, přeprošenja docpěja tež studentow w kućikatych kónčinach němskeje a snano budźe syć tež z pomocu na přihot za kóždolětnu Schadźowanku.

Datowa banka pak ma wam tež słužić, zo šće wo dźěłowych móžnosćach w serbskich institucijach a wobłukach informowani a runje tak ma słužić serbskim institucijam a druhim dźěłodawarjam při namakanju serbskorěčneho personala.

Zo by ZSS efektiwnje na tym dźěłać móhł, je na wašu pomoc připokazany. Wažny krok za to je mjezdruhim wupjelnjenje slědowaceho naprašnika. Za pomoc smy jara dźakowni.

K tomu namakaće pod https://www.dropbox.com/sh/u0bq0249yv30qyl/QFUhIlJMJy naprašnik a dokument k dato-škitowemu zakonjej w Sakskej. Wjeselimy so přez kóždu studentku / kóždeho studenta, kotraž/-yž so při naprašowanju wobdźěli. A dokelž wězo wšěch serbskich studentow njeznajemy a tež kóždu/kóždeho přez tutón puć njedocpějemy, prosymy was wo pomoc, w tym, zo komilitonow abo něhdyšich sobušulerjow na naprašnik skedźbniće.

Hdyž maće naprašnik wupjelnjeny, potom składujće tutón prošu tak: mjeno_předmjeno_studijne město.doc(x) (abo na open office format) a sćelće jón na  student.witaj.zss@live.de.

Wutrobny dźak wam!

Zwjazk serbskich studowacych (ZSS) - Bund sorbischer Studierender

Studować a so angažować 

Hłownje zwonka Łužicy dźěła Zwjazk serbskich studowacych (ZSS). Čłonojo

su (organizowani a njeorganizowani) serbscy studenća. Sobustawske

towarstwa eksistuja w Drježdźanach (Bjarnat Krawc) a w Lipsku (Sorabija

Lipsk). Krute, kóžde lěto so wospjetowace terminy we wobłuku dźěławosće 

zwjazka so tohodla hłownje w tutych městach wotměwaja.W Berlinje hižo 

wjace kruta studentska skupina njeeksistuje, ale studenća přewjedu, runja kaž 

w Halle, stajne zetkanja.  Z dźěławosću ZSS wusko zwjazani su tež 

čłonojo gymnazialneho towarstwa Societas Slavica Budissinensis na Serbskim 

gymnaziju w Budyšinje (tučasnje pak njeje towarstwo aktiwne).

„Bjarnat Krawc“ (Drježdźany) 

W Drježdźanach studuje na 50 młodych Serbow, kotřiž su potencielni čłonojo
studentskeho towarstwa „Bjarnat Krawc“. Srjedźišćo a hłowne zetkanišćo
towarstwa je dźewjata etaža internata na St. Petersburgskej droze w
Drježdźanach. Bohužel je so ze stron Studentskeho skutka předprawo Serbow
na stwu na tutej etaži wotstroniło. Jako wuspěch měło so tuž hódnoćić, zo
bydli tu tučasnje při wšěm 13 młodych Serbow.

Dźěławosć towarstwa „Bjarnat Krawc“ sćěhuje kóždolětnje mjenje abo bóle
krutemu planej. Započatk twori zahajenski swjedźeń noweho semestra.
Přeprošeni su wšitcy serbscy młodostni z Drježdźan. Nowačkojo so witaja a
swjedźeń skića móžnosć so w rozmołwje bliže zeznać. K skrućenju
zhromadnosće přinošuje adwentnička. Wjeršk aktiwitow Drježdźanskich
studentow pak je Nalětnje puć
owanje. Přeprošenje towarstwa na zhromadny
kónctydźenja sćěhuja serbscy studenća a młodostni tež z druhich městow.
Programowe dypki zarjadowanja su přednošk, pućowanje po Drježdźanskej
wokolinje (2004 do Sakskeje Šwicy) a wólna zabawa.
Jako reakcija na aktualne podawki wobdźělichu so Drježdźanscy studenća tež
na demonstracijach přećiwo NPD a běchu při poswjećenju dwurěčnje
pomjenowaneho ICE Bautzen-Budyšin ze serbskej chorhoju prezentni.

Nastupajo programowy přinošk za schadźowanku wuchadźa wjetšina
iniciatiwow ze serbskeje etaže. Tohodla zwjesela, zo dóńdźe zašły semester
dosć sylny dorost. Njehladajo na to pak hrozy dwójce wob lěto, zo so stwy
Serbam z rukow zhubja. Tomu móže so jenož ze sylnej iniciatiwu jednotliwcow
zadźěwać. Na dobro skutkowanja a wobstaća towarstwa by było dojednanje
ze Studentskim skutkom, zo so nimo Serbow jeničce (wukrajni) studenća do
serbskeje etaže zaměstnjeja, kotřiž jenož nachwilnje w Drježdźanach
přebywaja. Snano hodźała so próstwa towarstwa zhromadnje z oficialnym
zastupjerjom Domowiny přednjesć.
Zwonka etaže organizuja so serbscy studenća w Drježdźanach zwjetša přez
syć. Wažne dźěło je tohodla stajne aktualizowanje e-mailoweho adresnika.


„Sorabija Lipsk“ (Lipsk) 

Towarstwo ma něhdźe 30 serbskich a němskich sobustawow. Hłowne
zetkanišćo je „Centrifuga“ w internaće „Handrij Zejler“ na Bornaiskej droze
198b. Lisćina regularnych zarjadowanjow je dosć wobšěrna. Spočatk
zymskeho semestra so nowačkojo z małym swjedźenjom witaja. Sćěhuje
kermuška, na kotrejž so prawidłownje tež studenća z druhich městow
wobdźěleja. Planowane literarne kermušne čitanje w lěće 2004 bohužel
wupadny. Dalše zarjadowanje je hodownička. Jedyn z wjerškow dźěławosće
je póstniske zarjadowanje. Sorabija je do powšitkowneho cyklusa
Lipsčanskich póstniskich radow integrowana. Tohodla wotměje so póstnička
jako jeničke zarjadowanje hłownje w němčinje. Druhe, němske, rady dźakuja
so Serbam z tym, zo do swojich programow krótke serbske přinoški zapřijeja.
Sćěhuje ptačokwasne zarjadowanje, na kotrymž čitaštaj w lěće 2005 Michał
Nuk a Andreja Wałdźic ze "Zatajeneje njeprawdy".

Sorabija je 2004 nimo kabareta za schadźowanku krótkodobnje přewza
ła
zamołwitosć za wudaće satiriskeho časopisa „Šeršeń“. Lipsčenjo su tež
zwólniwi, tute dźěło dale wukonjeć. Při wšěm nadźijeja so intensiwneho
zhromadneho dźěła z druhimi studentskimi cyłkami.

„Pawoł Nedo“ (Berlin)

W Berlinje je tuchwilu na 25 serbskich studentow, kotřiž pak njejsu wšitcy w
towarstwje organizowani. Berlinscy studenća zarjaduja wjacore "Serbske
blida" na lěto. We februaru 2004 wobdźělichu so na diskusijnym wječoru na
temu "Hranicy přewinyć w Europje" w pólskim centrumje. W měrcu běchu z
hosćom w Ruskim domje za wědomosć a kulturu. W aprilu skićeše so čłonam
towarstwa móžnosć, sej dźiwadłowu hru "Krabat" wot Ottfrieda Preußlera
wobhladać Po lětnej přestawce wobdźělichu so studenća w oktobru na
kermušce w SKI, w nowembru pak na schadźowance. Tež na kritisko
zabawnym wječorku serbskeje kultury w katolskej akademiji běchu někotři z
nich z hosćom a so mj. dr. w diskusijach słowa jimachu.

„Societas Slavica Budissinensis“ (Budyšin, Serbski gymnazij) 

Gymnazialne towarstwo je ze swojimi čłonami po wuhotowanju 10-lětneje
róčnicy znowazałoženja w septembru 2003 dotalne projekty pokročowało a
dalše nastorčiło. Tak podpěruja sobustawojo hižo wjacore lěta aktiwnje
WITAJ-projekt w Malešanskej pěstowarni. Wot lěta 2004 su tutu pomoc tež na
Budysku pěstowarnju w Strowotnej studni rozšěrili. Po móžnosći tydźensce
wopytuja Sociećenjo na někotre hodźinki tutej kubłanišći.

W lěće 2004 zahajichu Sociećenjo tež akciju „wuporjedźenje serbskich
napismow na wjesnych a pućowych taflach“. Z kolesami podachu so na puć,
zo bychu zmylki dokumentowali a wotpowědnym instancam sposrědkowali.
Wotmyslena wopomnjata tafla k česći Oty Wićaza w Chwaćicach njeje so
chorosće wjesnjanosty dla hišće připrawiła. Projekt wostanje tuž tež w lěće
2005 aktualny, kontakt k wotpowědnym zamołwitym je so nawjazał.


Čłonojo towarstwa wobdźělichu so nimo toho jako kubłarjo na Centralnym
wubědźowanju w serbskej rěči a recitowachu na wopomnjenskim
zarjadowanju składnostnje posmjertnin Arnošta Muki basnje.
Na swojej prezentaciji w interneće towarstwo „Societas Slavica Budissinensis“
dale dźěła.